នាយកវិទ្យាល័យថ្មគោល ដើរសុំស្នាមមេដៃពីគ្រូឲ្យគាំទ្រខ្លួន
នាយកវិទ្យាល័យថ្មគោល ដើរសុំស្នាមមេដៃពីគ្រូឲ្យគាំទ្រខ្លួន
ករណីលោក ហ៊ីង ស៊ុនថារិទ្ធ នាយកវិទ្យាល័យថ្មគោល ខេត្តបាត់ដំបង ធ្លាប់មានរឿងអាស្រូវពុករលួយ ដែល CPN TV បានផ្សាយម្ដងរួចមកហើយកាលពីប៉ុន្មានថ្ងៃមុន ដើម្បីឲ្យលោករដ្ឋមន្រ្ដីក្រសួងអប់រំយុវជននិងកីឡាបានជ្រាបនោះ ស្រាប់តែឥឡូវលោកនាយកវិទ្យាល័យនេះទំនងជាភ័យខ្លួនខ្លាចក្រុមអធិការកិច្ចក្រសួងចុះទៅស៊ើបអង្កេត ក៏ដើរអង្វរលោកគ្រូ អ្នកគ្រូ ឲ្យជួយផ្ដិតមេដៃគាំទ្រ ដើម្បីលុបលាងនូវអំពើមិនល្អរបស់ខ្លួន ។
លោកគ្រូ អ្នកគ្រូ នៃវិទ្យាល័យថ្មគោល បានឲ្យ CPN ដឹងកាលពីរសៀលថ្ងៃទី៣ ខែមេសា ឆ្នាំ២០១៧ ថា លោកគ្រូ អ្នកគ្រូ និងបុគ្គលិកក្នុងវិទ្យាល័យនេះ មានជិត១០០នាក់ ហើយអ្នកព្រមផ្ដិតមេដៃ តាមការសុំអង្វរពីលោកនាយកនោះ មានតែជាង១០នាក់ទេ ហើយអ្នកព្រមផ្ដិតមេដៃនោះទៀតសោត គឺក្នុងនាមទើសទាល់ មិនហ៊ានជំទាស់តែប៉ុណ្ណោះ ។ លោកគ្រូ អ្នកគ្រូ ខ្លះបានបញ្ចេញមតិថា លោក ហ៊ីង ស៊ុនថារិទ្ធ ខ្លួនឯងធ្វើខុស ត្រូវគ្រូៗប្ដឹង បែរជាមកសុំលោកគ្រូ អ្នកគ្រូ ខ្លះ ឲ្យជួយផ្ដិតមេដៃគាំទ្រថាខ្លួនស្អាតស្អំ មិនពិតដូចការប្ដឹងនោះទេ ។
លោកគ្រូ អ្នកគ្រូ ដែលបានផ្ដិតមេដៃគាំទ្រខ្លះ បានលួចខ្សឹបមក CPN ថា បើមេមកអង្វរសុំឲ្យជួយហើយ បើពួកគាត់មិនជួយខ្លាចលោកនាយកអន់ចិត្ត ឬក៏គុំគួន អញ្ចឹងចេះតែផ្ដិតៗទៅ ។ លោកគ្រូ អ្នកគ្រូ ខ្លះ បានបន្ថែមថា បើលោក ហ៊ីង ស៊ុនថារិទ្ធ ខ្លាំង ឬក៏មិនខូច សូមឲ្យបោះឆ្នោតជាសម្ងាត់សាកមើលទៅ តែករណីដើរយកស្នាមមេដៃចំពោះមុខហើយ នរណាក៏គេផ្ដិតឲ្យដែរ ព្រោះបើមិនផ្ដិតហាក់បីដូចជាប្រឆាំងជាមួយលោកនាយកចំហពេក ។ លោកគ្រូ អ្នកគ្រូ បន្តថា បើលោកនាយកគ្មានកំហុស ខ្លាចអីឲ្យគេធ្វើអធិការកិច្ចទៅ ចាំបាច់អីដើរសុំស្នាមមេដៃឲ្យគាំទ្រខ្លួន ករណីនេះមានតែលោកគ្រូ អ្នកគ្រូ ជាង១០នាក់ទេ គាំទ្រ រីឯលោកគ្រូ អ្នកគ្រូ រាប់សិបនាក់ទៀត អត់ផ្ដិតមេដៃឲ្យទេ ក្នុងនោះក៏មាននាយករងខ្លះមិនផ្ដិតឲ្យដែរ ។ លោកគ្រូ អ្នកគ្រូ បន្ថែមទៀតថា សម័យនេះទៅហើយគេលែងប្រើស្ទីលសុំមេដៃគាំទ្រហើយ បើខុសថាខុស បើត្រូវថាត្រូវ នោះទើបសមរម្យ ។
បញ្ហានេះបន្ទាប់ពី CPN ផ្សាយមកមានប្រិយមិត្តផ្ញើសារមកជាច្រើនថា លោក ហ៊ីង ស៊ុនថារិទ្ធ ស៊ីដាច់លុយផ្ញើកង់-ម៉ូតូ កន្លែងលក់ដូរ លុយជំនួយ ឬលុយក្នុងគម្រោងរបស់ក្រសួង និងការដកលុយចាយខុសខ្ទង់ជាដើម ដោយមិនឆ្លងយោបល់ថ្នាក់ក្រោមទេ គឺគាត់ធ្វើអ្វីៗតាមទំនើងចិត្តរបស់គាត់ អ៊ីចឹងហើយបានជាលោកគ្រូ អ្នកគ្រូ ថា លោកនាយកមិនសមជាថ្នាក់ដឹកនាំវិទ្យាល័យថ្មគោលនេះទេ ។
គួររំលឹកថា កាលពីពេលថ្មីៗកន្លងទៅនេះ មានលោកគ្រូម្នាក់ឈ្មោះ វ៉ាន់ ប៊ុនណា បានប្ដឹងលោកនាយកនេះទៅក្រសួងអប់រំ ឲ្យជួយមានវិធានការតាមច្បាប់ តែរហូតមកដល់ពេលនេះ មិនដឹងថា ខាងក្រសួងបានចុះទៅធ្វើអធិការកិច្ចនៅឡើយទេ ។ ជុំវិញករណីកូនចៅប្ដឹងមេខ្លួនឯងនេះ CPN មិនអាចសុំការបកស្រាយពីលោក ហ៊ីង ស៊ុនថារិទ្ធ នាយកវិទ្យាល័យថ្មគោលបានទេ ។ ដោយឡែកលោកគ្រូ អ្នកគ្រូ នៅអនុវិទ្យាល័យម៉ឺនជ័យ ខេត្តបាត់ដំបង ដែរនោះ បានខ្សឹបមក CPN ថា សូមឲ្យចុះទៅមើលនាយកអនុវិទ្យាល័យម៉ឺនជ័យ ផង ព្រោះមានរឿងអាស្រូវខ្លះជិតផ្ទុះហើយ ។ ដូច្នេះករណីអនុវិទ្យាល័យម៉ឺនជ័យ នេះ CPN នឹងផ្សាយនៅថ្ងៃខាងមុខឆាប់ៗ ខណៈរកបានព័ត៌មានពិត និងគ្រប់ជ្រុងជ្រោយ ៕
------------------------------------------------------------------------
ទំនាក់ទំនងថតនិងផ្សាយស្ពតពាណិជ្ជកម្មគ្រប់ប្រភេទ
Comments
Post a Comment